2015年9月23日 星期三

壹週刊大批判 - 建華集團

壹週刊大批判 - 建華集團
唔知建華啱唔啱,不個我舉以下例子,大家睇下有冇問題呢? 
置富產業租商場比百佳,屈臣仕,豐澤
新鴻基都趕走吉之島,放自已一田百貨入新鴻基商埸
建華承租 - 天瑞街市   (Linkreit.com photo)

==========




上市十年的領匯,上月改名領展(0823)之後不夠十日,即大鑼大鼓宣布,翻新重開有廿六年歷史、位於港島東公屋的小西灣街市,旋即成為焦點,皆因新街市有不少話題之作,當中最有綽頭的攤檔叫i-Chicken視像買雞,飲食節目主持盧覓雪都去做騷。

負責替領展管理的外判商建華集團,近日成為街市界茶餘飯後的話題紅人,由「豬肉大王」文卓培出任董事長,集團在全港有五百個零售點,賣豬、牛、魚、雞。本刊調查發現,建華董事持有的肉檔,原來都有進駐領展街市,換言之相關人士「又做管理又做商販」一條龍模式,其管理領展街市手法,有主導價格及租金之優勢。

1.   經營多間肉店

建華董事長文卓培、總監凌偉業有個豬肉王國,本刊翻查商業登記記錄,發現小西灣街市內五檔賣肉的,原來有四檔都由文卓培及凌偉業以不同公司名義持有,雖然它們表面上各有不同招牌(包括:冠華鮮肉、利豐鮮肉、新界佬、牛丸哥哥)。

有商販稱,早就知道許多檔都屬建華集團:「新界佬、利豐、順乜順物,農夫豬又好,其實都是他。他自己做埋,無競爭,點訂價都得,你消費者都是要幫襯他。」

2.   街市變連鎖店

小西灣街市內的店名,大部分極之普通,但它們其實是連鎖式經營而非個體戶,例如:賣元寶蠟燭香的廣同興香莊,全港有六間分店;i-Fruit、生記水果、細美水果,都由富凌有限公司持有;百匯海鮮、朝聯海產、利邦海產,則同屬聯發海產公司。

3.   主宰租務大權

街市充斥連鎖店,情況猶如領展商場近年大舉引入連鎖食肆、化妝品、時裝店的翻版,皆因財雄勢大的企業,才有能力承租美輪美奐的場地。今次領展引入建華管理街市,無晒臭味又有得用八達通的方便消費背後,卻暗暗牽起大戶稱霸的爭議。

建華一方面出任管理商,有權控制租金上落,但與此同時又引入關連零售店入場,租金制訂是否公平公正受到質疑。凌偉業回覆本刊時聲言,他以其他公司名義持有的攤檔,進場並無租金優惠:「做街市同做豬肉都唔同公司,係唔同人做,大家都要交數。你《壹週》同《蘋果》都同老細,但唔同部門,大家交條數都唔同。」記者質疑建華一條龍有壟斷之嫌,他就反駁肉檔並不是自己做晒,「牛肉都唔係我哋做,有公開招租,都有租俾人做。」

中大經濟學系副教授莊太量指,領展是私人公司,外判給哪間公司管理都得,但如果管理商並非以價高者得方式揀選租戶,而是「做數」優待旗下公司,就違反了公平競爭的原則。最終管理商控制多個街市檔,亦可能做到合謀定價。

撰文:吳婉英 攝錄:李育明、高仲明
===============



豬霸王身家7億 拍街市新星搞豆腐霸權

翻新後的領展小西灣街市,無濕無臭又光猛,有貴價西班牙火腿賣,更可用八達通付款,負責替領展管理的外判商建華集團,由身家逾七億元的「豬肉大王」文卓培、文景華兩父子,與及同樣做豬肉生意的「摩登街市佬」凌偉業持有。

旗下零售網絡不單止賣豬、牛、雞、魚,近年還積極擴充其他食品零售,較為人熟悉的包括:豆腐主義、包點先生、QunQunPan 麵包店等,都有租用領展商場。其中最惹火的豆腐主義曾被網民大舉抨擊,因它在深水埗的分店,開正在老字號公和豆品旁邊,一度開大喇叭推銷,以「鄉下人」來形容「唔識揀」的街坊,被炮轟衝着老店搞「豆腐霸權」,經傳媒廣泛報導之後才停止。不過,建華在各區的肉店,仍有大聲廣播的慣例,如今在領展街市搞街市DJ,未知靈感可是來自慣用的大喇叭。此外,法庭記錄顯示,凌偉業持有的肉食公司,曾被指控無牌。

一把年紀的建華集團董事長文卓培,由豬肉買手升呢變成摩登街市大王,自二零一二年埋得領展堆之後,他的生意版圖不斷擴張,公司註冊處資料顯示,建華由其子文景華及凌偉業做董事,其後再陸陸續續以建華之名,成立多間公司。

有行內人透露,凌偉業原本做飲食業,婚後才跟賣豬肉的外父入行,後來認識到文卓培,「大家都係投機主義,可以話一拍即合。」文卓培父子手頭的物業資產估值高達七億三千萬元,當中逾一億元與凌偉業一同投資。凌偉業主要負責建華對外宣傳,有商販形容他為人醒目,交際手腕強,領展更視他為街市佬的「明日之星」,「佢醒目,腦筋又靈活。佢叻啲,成功機會咪高啲,又識利用形勢。」文氏父子與凌偉業的王國愈做愈大,商販都認識這個「鐵三角」,但他們提起都意有所指:「對任何事都好,唔好以本傷人,或者用其他手段奪取人哋嘅嘢。」

凌偉業與大家樂主席陳裕光是好朋友,上週他應陳的邀請,以建華集團總監身份替香港市務學會主講營運街市,凌偉業在講座上說:「街市裡面,各行各業好多,我哋嘅主張係除非一啲好具競爭性嘅,譬如我哋做肉食批發係市場最大,我哋會自己做,原因係希望用我哋嘅長處,賣得平啲,用佢吸引返啲人嚟(買餸)。」

撰文:吳婉英  攝錄:李育明、高仲明

==============



繼小西灣街市之後,建華集團將陸續接手管理多個領展街市,包括:大埔太和邨街市、東涌逸東街市及屯門良景街市,進一步大展拳腳。其中太和邨街市已圍封裝修,上演小西灣街市踢走小商戶翻版,原本賣豬肉的陳先生稱,建華完全無意讓他續租,「我哋做豬肉,佢個老細又係做豬肉,所以佢都唔會同我哋傾話租俾我哋做,機會都唔俾。佢承包呢個街市,其他行業就會叫啲舊租客續租,豬肉檔就基本上唔會租。」他向其他舊檔戶了解過,得知租金至少加一倍,個別檔戶甚至加三倍。

街市是草根階層自力更生的平台,在街邊養活了幾代香港人。但時移世易,由大財團營運的街市不過是生財工具,小市民難以跟財雄勢大的企業較勁創業。有商戶感慨:「以前個年代,上、中、下,每個階層都有搵食嘅天地。回歸後,所有嘢都俾地產商擸埋,連街市都做埋。」

曾任天水圍頌富街市商戶聯會主席的馬偉標,多次公開批評領匯未有監管外判承包商。他最風光的時候在領展街市擁有五間雜貨店及麵檔,但隨著不同的承租商陸續接手管理那些領展街市,他的檔口一間一間被逼走,現在只剩天耀邨一檔。馬偉標指出,以前租用公眾街市,政府會因應市道去調整租金,即使會外判給承租商,房委會會讓檔販對承租商評分,以評核承租商的表現,但領匯並無此機制。

本地經濟學家關焯照認為,罪魁禍首是香港政府,「領展呢壇嘢演變成咁,係可以預見嘅,因為政府賣斷咗,佢一定係利益最大化。一定係俾啲有能力嘅租戶入去,小商戶一定俾佢踢走。」在新世代撐小店的本土意識氛圍下,領展街市勢將成為社會矛盾的焦點,下一個「反霸權」的抗爭戰場。

後記

記者連日到建華集團管理的領展小西灣及天瑞街市採訪,在耳目一新的環境下,卻有另一番體會。每當攝記舉起相機,就有街市保安走來要求停止採訪,之後說: 「你們採訪的話要先聯絡我們職員。」好了,不舉相機,只拿筆記簿記錄,同樣引來保安問候。記者沒答話,保安就採人盯人戰術,尾隨記者觀察一舉一動。又好 了,不拿簿,只握紙仔一張,同樣有人來:「小姐,有乜可以幫到你?」在嚴密監視的環境下,商販都不敢多說話。以往街市三姑問候六婆、順嫂八卦陳師奶那最直 率的真性情與人際互動,幾近消失。一個外表近乎完美的街市,它內裡的靈魂和社會角色,其實更值得人深思。

撰文:吳婉英  攝影、攝錄:李育明、高仲明  資料:鄭詠欣   news@nextmedia.com

================






上月底翻新後重開的小西灣街市,牆身、地板都鋪上五顏六色階磚,天花燈照得場內非常光猛。行入街市不覺有異味,地板不見有垃圾,就連賣魚範圍都通爽。六十個檔位設計統一,招牌是字款一樣的燈箱、價錢牌一律電腦打印,再無手寫發泡膠牌。貨物都擺放整齊,場內檔位均可用八達通付款,並有免費Wifi及手機充電等服務,又有街市DJ定時嗌咪幫檔位減價速銷,並有公正磅防呃秤等。

i-Chicken是小西灣街市內必到「景點」,皆因檔位有個大屏幕,直播五分鐘車程距離、由食環署管理的柴灣街市海記雞檔現場。客人在小西灣這邊可「隔Mon揀雞」,落柯打半個鐘之後,隻雞就會劏好送到小西灣街市。有市民知道小西灣街市翻新後重,特地從油塘過來i-Chicken檔前「朝聖」。不過,記者問過多名小西灣街坊,未有人試過用此服務。有街坊不太信任i-Chicken系統,表示仍會選擇到柴灣街市親自買活雞。

除了i-Chicken,小西灣街市還有一對「I」字頭的果菜檔,但個i有幾高科技,喬布斯在生可能都未必答得出。首先,門口的I Fruit其實是個廿四小時生果自動販賣機,好地地的新鮮生果要放入密封機器,話要方便上班族深宵來買。旁邊有人睇檔的攤位,則賣八十八元兩個韓國黃金桃、三百八十八元一個日本哈密瓜、過千元禮盒裝日本紅寶石提子之類的高檔貨。另一檔I Vege,賣的是比本地和大陸菜貴的墨西哥羅勒草、秘魯露筍、荷蘭黑番茄、以色列黃車厘茄等,但那個I字究竟代表乜卻無人知。

街坊都話,街市煥然一新,價錢亦跟翻新前差唔多,「但遲啲會點,就真係要放長雙眼先知。」亦有街坊透露,小西灣街市翻新前,約有四十八檔,如今九成人已離開,成功過渡的只有四、五檔。有前商販指:「當日話要入新街市,租金至少加三成,有的加一倍;入場要俾數萬元裝修費;之後每個月要俾一千元廣告宣傳費;檔位規定要裝八達通機,管理公司會在交易抽佣1.5%。咁多錢要俾,我哋小商戶根本頂唔順,只能夠投降。」

撰文:吳婉英

攝錄:李育明、高仲明

27 則留言:

  1. 其實同一個場or同一個街市內,一個老細有幾個檔口係好常見,政府街市都有咁嘅情況,唔明小記者好似發現新大陸咁

    回覆刪除
    回覆
    1. 的確係,好多掛名租戶實際上已經頂咗畀人做

      刪除
    2. 政府街市有D頂左擺貨同防止對手進場也常見

      刪除
    3. 如果要講政府街市,肯定會嘔到成地血。擺貨此其一,阻止競爭對手進場此其二,仲有圍標、黑戶租上租.....等等等等的流弊,數之不盡。

      以下獨媒的文章也提供了一些資料:
      【街市更新系列】食環署管理街市不力 無理驅趕記者
      http://www.inmediahk.net/node/1035485

      刪除
    4. 獨媒 : 真是一篇好採訪

      刪除
  2. 非常詳細的好報導。
    很多人想知多些街市內幕。

    回覆刪除
    回覆
    1. 記者都算有做過調查公司査冊

      刪除
    2. 做 Company Search 是最最最基本的指定動作, 冇咩大不了

      刪除
  3. 是常見的,最重要係領展同建華有溝通過,雙方同意就可繼續,否則也可在跟着來的街市如太和作微調

    回覆刪除
  4. 上面的馬偉標先生(曾任天水圍頌富街市商戶聯會主席)話,佢最風光的時候在領展街市擁有五間雜貨店及麵檔...

    呢D就係過氣的「既有利益者」,依家自己冇份咯,咪嘈嘈閉囉

    回覆刪除
  5. 置富埸內如只有一个超市,一定是百佳。公平说,场内亦会见759同萬宁分店。

    回覆刪除
    回覆
    1. 睇返萬寧分店,第一城因為唔係置富(及其前身長實)全資擁有先有吧?海怡/滙景一早賣咗所以都有,首都由地鐵持有所以都有,麗港城係置富響里昂基金買返嚟,其餘好似冇響長實/置富REIT旗下商場開店

      刪除
  6. 八達通機係八達通抽手續錢,唔係管理公司喎

    回覆刪除
    回覆
    1. 呢類雜誌係咁架喇,加個引號代表係受訪者講,唔關佢地事,個記者只係做記錄,而唔使求證

      刪除
  7. 你睇下記者小姐D用詞,內文充滿火藥味,真係唔知點講喇 》》
    領展街市勢將成為社會矛盾的焦點,下一個「反霸權」的抗爭戰場。

    回覆刪除
    回覆
    1. 「惟恐天下不亂」係佢地的風格

      刪除
    2. 而家領展四處起火頭... 社會矛盾起源, 就係領展
      領展先係「惟恐天下不亂」, 不斷殺街市, 逼走小商戶 同拒絕與其他人溝通

      刪除
    3. 古往今來,改革之路從不平坦

      刪除
  8. 之前以為街市沒有什麽大發展,經最近事件,才知道街市是領展的大寶藏,過去檔主都在支付低於市價的租值,如果街市進行大翻新裝修,當然是要交市值租金,檔主可能受保護太久了,有20-30年吧,還以為活在食環公營街市,提醒大家看看租約抬頭公司,大家並不是公屋租户,而是商業運作實體,就算公屋都有市值租金,請根據市場運作吧,我每天都行建華管理的太和街市,對於建華的街市管理深表讚賞,小西灣本灣市場更是代表作,井井有條,比較現在各區公營私營街市,你應該暫時不能在香港找到一家優於建華的街市承辧商,如果有請通知我,可能你批評她超市化,但我覺得她是界乎超市與舊式街市中間進化出來的新式街市,這個新商業模式是否成功就有待驗證,但我作為消費者就十分樂意看見,新式街市為我帶來良好的客户體驗,所謂的社會矛盾都是一些平時不去街市的人們,見火頭在那裏就冲往那裏。我不會盲目支持大商户或小商户,誰能夠提供良好服务及產品,誰就是好貓。
    再提醒大家領展是一家私營企業,請不要對她提出像房署或食環商場街市的補貼要求。

    回覆刪除
    回覆
    1. 說領展係一家私營企業就有D 唔準確, 佢唔係長江新鴻基。領匯係將公共資產私有化既產物。 好多街坊都期望街市運作好似以前咁... 街坊唔需要富麗堂煌既街市

      link仔可以落街市訪問下街坊... 無錯. 新街市會吸引多D人去, 但唔翻新, 係咪領展無錢賺? 係咪無人幫襯街市?

      領展根本不能收取市值租金, 一定要有折讓公屋居民才服的。不同市場有不同訂價
      總不能抱著有領展既地方就無人窮人既道理

      全港交市值租金既公屋企係得1-2%, 而且佢哋係要2年內搬走

      仲有, 建華街市既優質街市服務, 背後就係扼殺小商戶, 想休息就要向建華批假, 舖頭只能賣指定貨品, 賣雞蛋就唔可以賣豆腐; 訂價要向建華申報, 價錢牌要統一

      呢D 對檔主同商戶都唔係好事

      刪除
    2. 點解一定要有市場折讓租金?咁對果D經營得差但因為平租死霸舖頭嘅租霸就有利,但對小市民根本冇好處,更加唔駛講有D霸咗幾個舖檔去壟斷
      另外休息方面,其實唔係只係建華係咁,房署年代租約都有寫明要每日若干時間營業,否則要書面申請(有冇人咁做係另一件事),而診所嘅營業時間規定就更加苛刻

      刪除
  9. 深受其中,在此請教點離場,,冇人工出就算,但真係貼唔起,租貴,費多,小商戶生存難難難,,,,,最麻煩係間埔仔已經細到可憐,總要同街市管理供用,租照俾,費多多照俾,點生存,而家只想離場,在此請教高人指點

    回覆刪除
    回覆
    1. 睇租約有冇終止租約條款,有就跟終止租約條款做,冇嘅話只有同租務部講睇下可唔可以早走,但如果業主/分判商唔肯都冇乜辦法

      刪除
  10. 市民買貴30%餸菜,唯一方法要建多倍數的市政街市,等檔户有生存空間,市民可以有正常價值餸菜。
    政府有責。

    回覆刪除
  11. 到底你有冇去過街市,你知唔知好多政府街市十室九空養老鼠,邊個話畀你聽政府街市的餸菜一定平,唔該你睇下HK01呢個比較
    https://www.hk01.com/18%E5%8D%80%E6%96%B0%E8%81%9E/302024/%E6%B2%99%E8%A7%92%E8%A1%97%E5%B8%82%E7%BF%BB%E6%96%B0-%E6%B2%99%E7%94%B0%E5%8D%80%E5%9B%9B%E5%A4%A7%E8%A1%97%E5%B8%82%E6%A0%BC%E5%83%B9-%E9%A3%9F%E7%92%B0%E7%BD%B2%E8%A1%97%E5%B8%82%E6%9C%AA%E5%BF%85%E6%9C%80%E5%B9%B3

    回覆刪除