2017年5月11日 星期四

【東周刊】無王管 狂加租 車主大控訴 領展公屋停車場撳住搶

【東周刊】無王管 狂加租 車主大控訴 領展公屋停車場撳住搶
2017/04/24

公屋車主近日充滿怨氣,矛頭直指坐擁逾七萬個車位的全港最大停車場業主領展(0823)。本月初,領展旗下車位開始大幅加租,當中私家車平均加幅接近一成,不少收費拍得住私人停車場,旋即引發大批車主強烈不滿。尤其靠揸車搵兩餐的草根車主,由於區內別無選擇,怒斥領展猶如壟斷撳住搶。

行政總裁王國龍上場六年,領展股價已翻了兩番。造就一千二百多億市值的,其實是不斷使出奇招賺到盡谷高股價。領展早幾年已將多個屋邨停車場由月租「固定位」變成「浮動位」,表面上提高車位使用效率,背後是「搾乾」車主搶奪更多租金收入,甚至為日後拆售「整靚盤數」。

隨着本港私家車發牌數量年年上升,公眾車位供應卻逐年下跌,領展吼準供求失衡帶頭瘋狂加租,全港停車場勢將爆發澎湃加價潮。

領展旗下青衣長發廣場停車場,月租由去年兩千九百一十元,狂加至三千二百三十元,加幅接近一成一

被候任特首林鄭月娥點名要擺平的民生「三座大山」之一的領展,在她當選後急急發出聲明祝賀「示好」,強調會「繼續緊密合作,服務社區」。

然而林鄭尚未埋位,領展卻率先投下一枚民生「炸彈」,旗下公屋和居屋停車場以營運開支上漲為理由,今個月開始大肆加租。其中私家車平均加幅達百分之九點八,貨車及電單車則約加百分之五,遠高於通脹水平。

受影響的車主,不排除小部分屬公屋富戶,但更多是自力更生的貨車司機、的士大佬和小商戶等草根階層。領展瘋狂加價,變相趕絕搵食司機,飯碗隨時被打爛。例如青衣區的長發廣場停車場,月租由去年兩千九百一十元,狂加至三千二百三十元,加幅接近一成一,相當乸脷。

趕絕搵食司機
揸小型貨車搵兩餐的長發邨居民賴先生,焗租了長發車位十多年,最終頂唔順離場。他怒斥領展接手後,年年瘋狂加租。「最初月租一千兩百蚊左右,之後年年加,近年加得愈嚟愈狼!上年加到兩千九百一十蚊,心諗應該到頂啩?點知佢今年又再加!公共屋邨停車場要三千幾蚊一個月,畀都要畀得心甘命抵先得o架,三千幾蚊夠租兩間公屋啦!

由於負擔不起租金,賴先生惟有冒險將貨車泊街邊。「架車用嚟搵食,跑幾多轉先夠畀租?我住長發邨,附近長安邨又係領展場,月租一樣加到三千幾,邊有得揀?根本負擔唔到,所以無再租,焗住泊街,結果畀人抄牌!」

同樣大加特加的將軍澳區,不少車主亦怨聲載道。租了寶林邨車位七年的陳先生,對於領展年年加價只能無奈接受。「啱啱由二千五百蚊加到二千七百二十蚊,加幅接近一成。自己返工路程遠,養車有實際需要,唔通賣車咩?」

最令車主勞氣的,是領展一面撳住搶,停車場質素卻無改善。陳先生投訴寶林邨停車場有不少「死角位」,閉路電視根本拍攝不到。「試過架車畀人劃花,向管理處反映,一齊翻睇錄影帶,先知原來有唔少死角位!加上現時成個場都係月租流動車位,平時要同人鬥快霸『靚位』。唔好彩泊正死角位,成晚擔心到瞓唔到覺!」

車主勞氣領展一面撳住搶,停車場質素卻無改善。有車主投訴寶林邨停車場死位多,刮花無得賠。

將軍澳淪重災區
現時將軍澳可說是全港車位嚴重不足的重災區之一。西貢區區議員方國珊表示,區內車位最少短缺達一千個,造就領展不斷加租賺到盡。例如調景領的健明邨,私家車車位月租由二千六百三十元,加至二千九百二十元,加幅達百分之十一,相當誇張。

「領展無論係街市抑或停車場,一直都係租金貴、管理差!屋邨居民消費能力有限,但係要承擔巨大加幅。我哋之前多次提出反對,領展都係態度照舊!」方國珊說。

雖然領展將區內屋邨的「隨意泊」車位月租,由七百四十元下調至六百九十八元,方國珊批評只是「小恩小惠」的公關策略。「隨意泊只係畀時鐘停泊未滿時使用,唔保證有位,只有小部分日間停泊車主受惠。」

提起領展停車場租金貴兼管理差,住在李鄭屋邨的梁先生有切膚之痛:「領展管理嘅停車場,差過以前房署一百倍!

走進李鄭屋邨停車場低層,只感覺陰陰沉沉,還有一股垃圾味。梁先生苦笑道︰「停車場喺正垃圾收集箱隔離,平時唔多見有人定期洗地,晚上就勁多老鼠走嚟走去!搞到我唔敢泊架搵食貨車喺地下嗰層。夏天就快到,畫面實會好震撼!」

10 則留言:

  1. 「...,三千幾蚊夠租兩間公屋啦!」 哩句先係重點!一個價錢係有價有市由自由市場決定嘅,另一個價錢係人為津貼。

    回覆刪除
    回覆
    1. 其實衹係叫醒果D沉醉係昔日房署津貼既人士,你已經有間平屋,唔係奉旨配埋個平車位比你架,同埋講你知乜野叫market price ,我地大家都要共同承受的

      刪除
  2. 搵食車主爭車位嘅對手係私家車主, 如果泊車費用好平,相信搵食車想捱貴租換個位嘅機會都無!

    回覆刪除
    回覆
    1. 你當車位好似入油咁樣,油站話之你係私家車定貨車,入得油站就係跟掛牌價,你衹可選入或者不入

      刪除
  3. 領展停車場保安咁多年都冇改善,cut咗人手就少咗人巡

    回覆刪除
    回覆
    1. 好似大部份停車場都外判左,可唔可以要求加人手呢

      刪除
    2. 好似大部份停車場都外判左,可唔可以要求加人手呢

      刪除
    3. 外判商跟合約辦事,領展本身份合約內唔放多D人手嘅話係冇用嘅
      亦可能係寫合約果個冇了解實際需要去編排人手,只係識cut人去慳錢,咁外判商都係睇餸(合約)食飯

      刪除
    4. 我估應該有條formula計人手架,冇理由特別減人手?

      刪除
    5. 以前聽過有個盤要商場保安巡埋停車場

      刪除