2015年12月20日 星期日

天盛街市看領展八達通褪色中

昨天(2015-12-19)巡視新場天盛街市,天盛是領展自己營運,外觀基本上滿意,但八達通應用竟然是倒退的,除建華豬肉檔堅持使用先進的「八達通一磅即付」系統,去除舊式街市價碼不清及呃秤陋習,其他餘下天盛街市檔,八達通機消失得無影無踪,魚檔繼續找換染血及帶有魚鱗的散紙給客人,天盛街市檔價錢牌也百花齊放,有大有細,字體有粗有幼,也有一些不標價,現場有充足領展工作人員,但看不到與檔主互動推動生意,跟本灣/太和街市建華管理現場工作人員,主動輪流為每檔促銷,有天同地分別,滿心歡喜從大埔往天水圍看新街市,但天盛街市管理令我有點失望。

為引證領展八達通應用退步,今天(2015-12-20)到大元街市引入八達通機的首個試點觀察,同樣是表現不理想,雖然大部份都有安裝八達通機,但情况跟2014年太陽報介紹一樣沒有改善,拍了幾張照給大家參考。






外牆仍標示大元是八達通應用街市
太和街市所有八達通機都安裝在當眼位置

良好的八達通機安裝位置

=============

SUN驚奇:領匯懶理檔戶死活 街市逼裝八達通 
2014-02-24 太陽報
領匯陸續翻新公共屋邨街市,要求新簽約或續約的檔戶加裝八達通付款系統,聲稱可方便街坊買餸,不過檔戶既要每月支付二百至數百元的租機費,每單交易中亦要交手續費。有檔主反映八達通不適合街市經營模式,亦無助提升生意額。本報在多個街市發現,不少檔戶就算白繳租機費,亦寧將八達通機收起,免客人「嘟一嘟」而被分薄利潤。立法會議員批評領匯強制檔販加裝八達通機及要承擔租機費用,極不合理。

- 大部分樂富街市檔戶以雜物遮蓋八達通機,似對領匯作無聲抗議。
- 戶朱先生不懂得操作八達通機,索性放進櫃底。
- 大部分街坊仍習慣以現金買餸,八達通繳款方式,於街市仍未普及。
- 友愛街市最近開始引入八達通機,商戶指全日無人使用。
- 樂富街市檔戶以各樣方法遮蓋八達通機,為免因用機而不斷上繳收入。
- 大埔大元街市是領匯引入八達通機的首個試點,街市外有廣告宣傳服務。

街坊點睇
- 楊小姐(藥材業):街市商舖都無講,都唔知道可以用八達通畀錢,如果知道都會試吓用。
- 黃小姐(主婦):我習慣用現金去買餸,平時都好少用八達通畀錢。

自接管公屋街市後,領匯銳意將街市打造得更現代化,先後於幾個翻新街市陸續引入八達通付款系統,包括大埔大元街市、黃大仙樂富街市、馬鞍山耀安街市、何文田愛民街市及屯門友愛街市。惟記者巡查後發現,雖然八達通付款被視為乾手淨腳,但檔主卻不受落,其中樂富街市每檔口都設有固定支架放置八達通機,但不少人以毛巾及雜物遮蓋,似作為對領匯的無聲抗議。

水果檔主怕麻煩冚機

「一啲都唔方便,一句講晒,麻煩!」以毛巾冚着八達通機的水果檔檔主林先生稱,街市檔加裝八達通機對生意無幫助,甚至變相「趕客」。林表示,裝置操作複雜且花時間,他先要以遙控輸入金額,再着客人拍卡付款,但他的檔口位於轉角,八達通機只得一部,他要同一時間應付兩邊過來的客人,收錢最緊要快,「一手收錢,一手交貨最有效率,唔通叫個客等一陣,又行過嚟呢邊,搞一大輪用八達通畀錢咩?隔籬左右都係賣差唔多嘢,你慢少少,啲客已經行咗去第二檔喇!」
另一個以紙皮遮蓋八達通機的檔主勞氣地表示,使用八達通機交易,要支付手續費,變相剝削他們的利潤;另一檔主更直言收費不透明,「只要你嘟一嘟,就要畀手續費,要收生意額嘅超過百分之一,實際都唔知點計。」因街市生意屬小本經營,不少檔主為求慳得就慳,寧願白繳租機費,亦避免因使用八達通而要不斷「科水」。

老夫婦不懂操作白裝

大埔大元街市是首個八達通付款系統的試點,記者於現場所見,多個檔口已安裝八達通機,但檔主卻反映,安裝至今兩年多,使用率偏低。經營草藥店多年的朱姓夫婦不諱言,街市翻新後就被要求安裝八達通機,但現時已將八達通機收進櫃底,原因是夫婦年紀大,他們根本不懂操作八達通機收費,初時曾試過使用八達通收錢,但嘗試多次都未能成功,「咗幾次都錯,我哋都費事拎出嚟啦!」八達通機安裝至今未曾派用場,但他們每月仍要向八達通公司交付約二百元的租機月費。
另一不願透露姓名的香燭檔老檔主,亦反映不懂操作八達通機,上月因使用量極低,已被八達通收回裝置。而即使檔主懂得使用,亦不見八達通付款系統應用普及,有檔主稱,每周只有數人會詢問或使用八達通付款,「唔覺八達通機可以幫我賺多幾多,連租機錢都唔夠畀啦!」
而最近裝修重開的屯門友愛街市,暫時只有少量檔口已開業,雖然大多數檔口已安裝或正安排裝八達通機,但依然乏人問津。「開咗成日檔都無用過!」一名菜檔檔主說。

商戶為簽約無奈屈服

據悉,商戶跟領匯簽新合約時會被要求裝機,即使商戶認為八達通機無必要,亦無法反抗,「佢同我講話,唔裝就無得簽約租舖,佢咁講,你可以唔裝咩?」商戶為求獲得租約,租下八達通機當「護身符」。他希望領匯可從善如流,按各檔戶的營運模式,讓商戶自行決定是否裝機。
立法會議員陳偉業批評,領匯強制要求街市檔戶加裝八達通機做法不合理。商戶要自行承擔租機費用等開支,變相令商戶收入減少,而且硬性規定裝機,亦是領匯不信任檔戶表現,不排除是想記錄他們營業額,「自己利益就要賺盡,但小商戶就要面對開支增加嘅問題!」
領匯發言人未有回應有否強制要求檔戶安裝八達通機,只稱有鼓勵檔戶採用相關服務,而領匯並無就電子貨幣服務的裝設及使用收取任何費用。發言人又稱,正陸續於更多已完成提升工程的街市,向商戶推介採用電子貨幣服務。對於檔戶的八達通機租金及手續費等收費,八達通卡發言人稱,與檔戶屬合作夥伴的商業安排,不便透露有關資料。

10 則留言:

  1. 在推八達通使用率方面,建華比領展落力

    回覆刪除
  2. 既然八達通不受檔主或部分街坊歡迎,為何要硬推。手續費邊個俾?新增盈利增幅能抵銷手續費嗎?

    科技要適當使用

    回覆刪除
    回覆
    1. 正如你講「既然八達通不受檔主或『部分街坊』歡迎」,即是有部分街坊是歡迎啦,畀街坊多個選擇,有何不可?
      不要忘記,你係「唔鍾意領展」,你係「想天耀街市連濕檔一起保留」,毋忘初衷呀,唔使將話題扯到咁遠。

      刪除
    2. 新聞都提過, 用既人有少, 商戶要俾租機費同手續費喎... 如果八達通機係受歡迎點解檔主唔肯用? 俾多一兩個顧客選擇, 但要剝奪檔主盈利, 你仍為可取嗎?

      天耀街市都受街坊歡迎, 點解領展唔俾多個街坊多個選擇, 有何不可? 點解有要關閉?

      刪除
    3. 你都知領展D租金有幾貴啦,根據你講,燒臘檔要月租9萬大元,裝部八達通機畀街坊用下都只不過係九牛一毛之嘛,咁都斤斤計較

      刪除
    4. 呢D叫百上加斤,
      八達通受唔受市民同檔主自然會有佢既選擇, 如果大元街市檔販覺得八達通機可以吸引人流, 就唔使收起部機... 其實領展叫人裝八達通機目的係咩? 既然八達通喺街市咁難用, 有堅持必要?

      刪除
    5. 其實你係檔主還是消費者?

      刪除
    6. 睇新聞報導, 同地區團體調查, 有D商戶係會唔覺意整壞部八達通機
      因為八達通機set價錢麻煩(無barcode) 同埋要手續費

      領展咁堅持, 其實係咪想監察商戶數據先?

      有D行業試過用八達通但真係唔成功, 例如的士, 街市等
      強推無意思

      刪除
  3. 價錢牌百花齊放本身就係好事,老闆鍾意咩時候賣幾錢,應該老細話事。好似天瑞咁,下下要過問中央print價錢牌,無咗個別商戶特色囉!以為自己去咗citysuper?

    回覆刪除
    回覆
    1. 呢一點O2也同意,天盛的價錢牌有不同款式,我都覺得冇咩所謂,只要係清清楚楚,企企理理就可以了。
      都係嗰句:Chi Ho, 不要忘記,你係「唔鍾意領展」,你係「想天耀街市連濕檔一起保留」,毋忘初衷呀,唔使將話題扯到D細眉細眼的地方為拗而拗。

      刪除