2015年6月29日 星期一

茶餐廳倒閉 租金不是主因

以前曾討論 (2013年9月29日) 領匯租金與商舖成本 , 最近翠華及大家樂公佈業績 , 大家可看看租金佔茶餐廳收入比例 , 兩者皆接近 :
食材約31% , 人工約27% , 租金約13%
所以如有茶餐廳倒閉, 租金並不是主因

參考資料(待更新) :
大家樂(0341),大家樂亦開發其他品牌公司 : 一粥麵及利華超級三文治 , 意粉屋及Spaghetti 360,台式咖啡蛋糕烘焙專賣店「85℃」, 專營米線的品牌「米線陣」 ,西式美食的「ME.N.U.」及「Cooking Mama 360」, 獨家經銷的合營意大利咖啡店「Espressamenteilly」及提供健康果汁及輕盈餐連鎖休閒快餐店「MIX」

大快活(0052)走的路線與大家樂相似,但店舖特色相比大家樂少,墾丁茶房, Cafe Oasis , Cafe Porto(波濤), 滾滾紅茶 ,摩囉街 , 老友記茶餐廳 , 友天地燒味小廚


20150628 蘋果

===================
茶餐廳越刻薄越快樂  
 2015年06月28日 股榮

三間本港連鎖快餐店上周相繼公佈業績,最靚仔是大快活(052),盈利按年升34%,反觀龍頭大家樂(341)及貴價茶餐廳翠華(1314),利潤增幅均只有1%。
同樣做茶記,何解有如此分野?股榮嘗試由業績裏解構,得出的結論是,越刻薄,越快樂。按照目前三大連鎖茶記的策略,翠華今年恐跌穿招股價(2.27元),而今年大躍進的大快活,可以繼續跑贏,大家樂則四平八穩,但未必人人快樂。
 茶記是一盤好睇唔好食、且靠死慳先搵到錢的生意。八卦搜索飲食網站Openrice資料,目前本港做茶餐廳/冰室的餐廳有2,680間,過去數年倒閉已結業的,則有250間,死亡率接近一成。倘非做大達致經濟規模(Economies of scale),根本很難生存,或者只能賺到辛苦錢。
做茶記有三大開支,食材、人工及租金。三大茶記集團,每100蚊生意,翠華三大開支合共佔72.7元,淨賺8.7元;大家樂三大開支佔71元,淨賺7.98元;大快活三大開支佔70.9元,淨賺6.41元。純利率最少的大快活,股價反而最標青,最重要原因,是純利率改善。上年度大快活純利率為5.3%,今年度升至6.4%,股價績後再升,某程度憧憬今年純利率再升,追貼兩大集團。
在茶記裏,一個百分點的利潤率增減,已經是很大的差距。至於大家樂,純利率由8.51%跌至7.98%,翠華更由10.59%降至8.72%。馬後炮睇番,翠華股價自高位蒸發一半,今年累跌8%,其實並非意外。
股東滿意 顧客無奈 員工辛勞
今後三大集團可以做的,不是開源,就是節流。所謂開源,就是加價。翠華近期將部份餐飲及食品加價,一杯奶茶由19元加到21元,凍飲加多2蚊,加幅逾一成,變相加一。大家樂、大快活奶茶,則同樣售10元。一杯奶茶,差一倍價錢,值得與否見仁見智,但目測所見,以往在門外排隊等位的人龍,已經逐漸消失了。
去過大家樂、大快活食飯的朋友,應該見識過他們有如機器般的流水作業出飯系統,由負責人搣紙嗌咪到餐飲食物準備上齊,只是一兩分鐘的事,且在開新店的情況下,很難想象總人手會由去年度約17,500人,減至今年度的17,418人,同樣的情況出現在大快活身上,員工按年減少100人,至4,500人,翠華則在加開11間分店下,員工增加216人。
早前有大家樂員工投訴,被迫加班至「On Call16.5小時」,而且有「地獄更」,每周工時高達83.5個小時。
承諾令「顧客快樂、員工快樂、股東快樂」,乃大家樂名稱的由來,但捫心自問,要做到談何容易呢?大家樂CEO在記者會上指,前線員工平均加班約2至3小時,日均工作約11.5小時,希望工時縮短至11小時。「只係初步目標,如果的起心肝做,應該可以再做好啲」。典型的「非不能,實不為」。
作為大家樂股東,我絕對滿意業績及派息;作為顧客,除了食物份量縮水,只能無奈,卻不會罷食。對於員工,股榮只能向辛勞工作的他們,講聲唔該、多謝。
P.S.朋友P及堂哥,十年前返工每日下午茶例必叫份大家樂茶餐,P更身體力行,話買大家樂股票,對沖食飯錢,促使我買了人生的第一隻股票。很多網友查詢應該買甚麼股票,其實由日常生活開始,留意身邊事件及消費模式,揀股應該錯不了。


15 則留言:

  1. 本港飲食業目前的困局是勞動力不足,自從實施最低工資後,食肆的經營環境更嚴峻

    回覆刪除
    回覆
    1. 嚟緊如果標準工時立法,可能仲嚴峻

      刪除
    2. 所以最低工資及標準工時到底係唔係幫個社會呢?

      刪除
    3. 其實標準工時可能仲差咗,首先,我唔知果班定44個鐘嘅人係點計出嚟,係咪坐寫字樓度出嚟唔知社會點運作。而家唔少保安返6日,當返8個鐘,連15分鐘交更都49.25啦,更加唔駛講清潔工返9個鐘,咁標準44小時,明顯唔夠冚啦,唔通請半個人做?咁而家返開9個鐘,收開最低工資嘅,突然間cut佢工時,咁佢仲夠唔夠收入先,係咪要迫人搵多份兼職?咁佢搵多份兼職,就失去立法原意,希望在職者有時間陪屋企人啦。至於果D創意行業例如廣告創作、程式編寫員等,通常係以成果計算,趕工時搞唔掂唔收得工,咁響標準工時下咪OT到暈囉,但呢D行業接job時係以成果計算,真係立法我都唔知對呢D行業有乜衝擊了。另外果D導遊、紀律部隊等要響非工作時間接call嘅,又唔知點計工作時間了

      刪除
    4. 都係追影族心水清, 你係唔係做過商場營運架 ?

      刪除
    5. 諗諗下,究竟食飯鐘計唔計標準工時?有D公司食飯鐘冇錢收,呢D真係有排拗

      刪除
    6. 其實可計可唔計, 冇規定, 好似病假, 有D公司冇薪

      刪除
    7. 你話可計可唔計,睇下班議員係咪認同你講法
      另,如果連續4日以上病假,法例係要出糧的嘅

      刪除
    8. 標準工資加快淘汰小商戶

      刪除
    9. 病4日就冇辦法,係要比錢
      標準工資/工時, 真係加速小商戶倒閉

      刪除
  2. 買股如買大小:
    賭大買大家樂, 賭小買大快活, 賭圍骰買759阿信屋...
    不過,我揀做莊,買領匯,長遠而言必勝。

    回覆刪除
  3. 係呀, 因為 3 間公司都要進貢比皇上 , 感覺好爽

    回覆刪除
  4. 點評網都有企業天地
    http://www.dianping.com/shop/5339839

    回覆刪除
  5. 這是篇好文章。
    就算是標準工時實施,大集團的三間總有辦法經營。
    日後有多些商場商戶比較文章就好。
    如SaSa鬥colourmix。
    我早餐會吃大快活,茶餐多是大家樂。

    回覆刪除
    回覆
    1. 做認真比較,係好花工夫架,真係要對項目有興趣,先做得好

      刪除